tg-me.com/Hussin113/143
Last Update:
بيدي هلت اترابج وعيني تهل
كلشي احملة وفگدج الما ينحمل
ما محسب من افگدج هيج اصير
ساعة ميت ساعة ارد اكعد عدل
ابد ما حسبت نتفارك بيوم
ولا حسبت اكلمج ما تردين
ليلية ابچي المگبرة عليج
اون بسمج وانت ما تسمعين
يعني معقولة بمماتج ما الج حيل الكلام
ما اريدج تكلميني بس تردين السلام
اشمحلى اسمي بلسانج …والله مشتاگ الحنانج
_______________
بوحشة گبور و ونيني ينسمع
ومن سكوتج ما سكت بيه الدمع
فاطمة انه علي ليش السكوت
لو حجيتي يمكن يلجمج ضلع
يمكن جرح صدرج لسة ما طاب
ولسة ايدج بعدهي فوگ الاضلوع
جا شمسوي بيج الدافع الباب
اذا باللحد گلبج بعدة موجوع
فاطمة اشكيلي همج بس اريد اسمعلي صوت
كسر البسمار ضلعج وانه كاسر گلبي موت
هاي شدة مدري فرگة…بابج وگلبي تحرگة
_______________
ما محسب هيج عگبج انكسر
ماكو امل جية الج حتى انتظر
عگبج اشما عاينت عالباب اطيح
ومثل ما عصروج كل يوم انعصر
فگدج كسر اضلوعي وخذة الحيل
ومن بيتي الج گمت اعثر اهواي
بوجودج من امشي راسي مرف
وهسه بانت الكسرة اعلة ممشاي
داخل بگبرج يزهرة وانه حماي الدخيل
لو تردين اعلة دارج لو الم ولدي واشيل
استضعفتني الناس عگبج ….يالحنين اعلية گلبج
_____________
فاطمة عگبج بقل جلمة انكسر
ال(وين امنا )خلت بگلبي جمر
من ارد منج ينشدوني عليج
ما ترد البيتها وتنسى الگبر
امل عدهم تردين اعلة الديارة
وانه غاية آمالي ردة اجواب
انه امتانيج فوگ الگبر كل يوم
و اولادج يتانونج على الباب
البيت كلة يصيح بسمج وعطرج الما ظن يروح
وين ما نكعد يزهرة ريحتج يمنا تفوح
وين ما نكعد ننوح ….عايشة ويانه الجروح
_________
فاطمة بليلة اجيت وصحتي رد
هسه زينب گاعدة تدور نشد
وارجعت اركض شفتها ودمعي سال
بثوبچ اتلگتني گالت بوية اخذ
اخذ ثوب امي ليها هلبت تعيش
انه ميتة وعشت عالثوب ايام
عطرها يفزز الميت من اسنين
اذا ما ترجع امي بوية ما نام
وهذا حالي بين گبرج بين ارد ليها التنوح
انتي اخذتي حيلي مني وبنتج اخذت مني روح
اجي يمج انكسر…وزينب تگصر العمر
_______________
تورثج زينب يفاطم كل جرح
بس عليج تزود يا وجه الصبح
انتي متي لأن جتفوني بحبال
وزينب تشوف الاهل من تنذبح
تخافين اعلة زينب تبجي بالليل
جا باجر شلون بكربلاء شلون
تظل من غير اخو ما بين الاجناب
واسياط الشماتة تكسر الامتون
هسة تبجي لفكدج انتي وباجر لفگد العمام
تصيح حيهم يا ال هاشم راح يدخل ضعني شام
ماكو واحد ينتهظ …والاخوان اعلة الارض
BY سيد حسين الفاطمي
Warning: Undefined variable $i in /var/www/tg-me/post.php on line 280
Share with your friend now:
tg-me.com/Hussin113/143